Ермолаеволағы Рамаҙан мәсетендә район имамдарының форумы тамамланды.

Яңы ғына Ермолаеволағы Рамаҙан мәсетендә район имамдарының форумы тамамланды. Ялған араҡы һатыуға ҡаршы көрәш темаһы буйынса һөйләшергә ундан артыҡ дин әһеле килгән. Мәсеткә килеп кергәс тә, бешкән тәмле ит еҫтәре танауҙы ҡытыҡланы, тик бында килгәндәрҙә әлегә ашау ҡайғыһы юҡ ине — халыҡ ныҡ эсә, ауылдарҙа араҡы, көмөшкә һатыусылар күп — ҡалайтырға? Хакимиәттән Ләйсән Нуриәхмәтова, мәғлүмәт бүлеге начальнигы, шәхси мәсеттәр булырға тейеш түгел, тине (беҙҙә ҡайһы берәүҙәр тота ла, давай мәсет һалайым тип эшкә тотона, улай ярамай, тейешле ерҙән рөхсәт кәрәк), тыйылған китаптарҙан ҡотолоғоҙ, былтыр, ана, ике мәсеттә таптылар, юғиһә, тип сығыш яһаны. Районда ике ауылда рәсми мулла юҡ, унда әле улай-былай намаҙ уҡып йөрөгәндәрҙе рәсмиләштереп ҡуйырға кәрәк, һәм, ғөмүмән, күп имамдарҙың Диниә назаратынан бирелгән рөхсәт ҡағыҙҙарының срогы үтеп бара, кемһенеңдер срогы күптән сыҡҡан, был эште лә башҡарып ҡуйырға кәрәк берәй көн күмәкләшеп автобусҡа тейәлергә лә Өфөгә барырға..
Араҡының нимә аңлатыуы хаҡында Азат Хәлилов апаруҡ ҡына лекция уҡып ташланы. Абдул, Мәмбәтҡол, Тимербай, Яҡуп имамдары ҡыҙыу ғына телмәр тотто. Элек совет заманында тәртип бар ине, эстениһәң, шунда уҡ ҡаты яза көттө. Участковый ҙа шәп эшләне, хәҙерге кеүек НИВАла йөрөмәне, атта йөрөнө, шулай ҙа һәр ауылға барып етә ине, әле бына беҙ кем участковый икәнен дә белмәйбеҙ. Араҡы һатыусыларға ҡарата законды строгийыраҡ итергә кәрәк, эләкте икән, ярты миллион һум штраф сәпәргә. Беҙ вәғәз һөйләйбеҙ ул, тик кешегә барып етәме икән? Араҡы һатыу-сығарыуҙы, совет осорондағы һымаҡ, дәүләт монополияһына бирергә кәрәк, шунда тәртип тә булыр ине. Беҙҙән генә тормай шул, араҡы һатҡандың өйҙәренә барып әрләшеп тә йөрөй алмайбыҙ, һәр эштә лә дәүләтһеҙ булмай.

Источник